Cartlanna Clibe: Alan Titley

Is aoibhinn an saol….

Uaireannta Go minic De shíor, shamhlófá, bionn an gearán chun tosaigh ar an mblag seo. Gearán faoi Fhoras na Gaeilge, gearán faoi na poilíní teanga, gearán faoi easnaimh ar TG4 agus ar nithe eile nach fiú a lua anseo, gearáin, gearáin, gearáin.

Bhí mé chun gearán a dhéanamh faoin easpa súntas a tugadh don Ghaeilge i gceiliúradh 150 bliain an Irish Times….[nuachtán ag foilsiú ar feadh 150 bliain, samhlaigh sin – d’eirigh le Lá/Lá Nua an ceathrú chéid a shroichint, geall leis, agus ba mhiorúilt de short éigean a bhí ansan] ….ach nuair a léigh mé alt Alan Titley ar maidin, chuir sé claochló ar mo dhearcadh.

Is fiú an t-alt ar fad a athchló anseo – ach nior mhaith liom an trácht a bhaint uaidh ar shuíomh an Irish Times. Má thugann go leor daoine cuairt ar an alt, b’fheidir go n-aithneoidh saoistí an Irish Times gur cheart níos mó spáis a thabhairt don cholúnaí seo, sin Alan Titley atá i gceist agam, níos mó ná an leath cholún fánach ar imeall leathnaigh ar aon nós.

Is leor an méid seo a léamh chun na scamaill atá ag luí ar mo chroí – agus b’fheidir do chroí – a scaipeadh ar feadh seal…..

Tá eala an anama ag snámh go maorga ar lochanna an domhain. Tá gile na maidne ar fháithim na gcnoc agus tá na muisiriúin gheala ag péacadh aníos ar chaonach bog na coille. Tá lucht oifige ag ceannach ticéid don chrannchur náisiúnta agus ag cuimhneamh ar laethanta saoire na samhlaíochta. Tá cailíní óga ag féachaint ar shobaldhrámaí á gceapadh dóibh go bhfuil baint acu leis an saol. Tá fir óga ag ropadh go mear ar ghluaisrothair, boladh na hola ina gcloigeann. Tá madraí ag súgradh le madraí agus a srón leis an sceach is gaire. Tá sluaite ag dul go dtí cluichí gach seachtain agus pian an phléisiúir agus pléisiúr na péine á nglacadh acu. Tá foireann Chill Chainnigh ann – damnú orthu agus ar a cuid ealaíne! – agus tá girseacha óga ag imirt cispheile i gclós scoile agus gáire ar a mbéal.

Nach méanar dúinn atá Gaeilge againn, fiú má tá sí ‘abhairín scaoilte’, gur féidir linn a léithéid a bhlaiseadh ar maidin. Gaoluinn atá nios mílse ná an sú oráiste úr bhrúite. B’fhéidir dá léifeadh an bhean uasal a bhí ag maíomh gur teanga ‘eisíach’ í an Ghaeilge an alt ó pheann Alan Titley go dtuigfeadh sí go raibh dul amú beag – nó nach beag – uirthí.

Ach sin an ghearán ag sleamhnú chun tosaigh aris. Ní féidir é a chur ó dhoras ró fhada, an dtuigeann tú, sin é ár nadúr.

Fillfear ar an ghnath sheirbhís go luath… Idir an dhá linn tá an léasa aoibhnis seo á chur ar fáil díobh ag Alan Titley agus, le bheith ‘féaráilte’, an Irish Times.